సొరియాసిస్‌ఒక దీర్ఘకాలిక చర్మవ్యాధి.  ఈ వ్యాధికి వయసు, ప్రాంతం, స్త్రీ పురుషులనే తేడా లేదు. వేసవి, వర్షాకాలాల్లో నిద్రాణంగా ఉన్నట్లు కనిపించే దీని లక్షణాలు చలికాలంలో మాత్రం తీవ్రమవుతాయి. సొరియాసిస్ వంశపారంపర్యంగా సంక్రమించే అవకాశం ఎక్కువ. ఇది అంటువ్యాధి కాదు. శరీరంలో రోగనిరోధక శక్తి వ్యవస్థలో వచ్చే కొన్ని అవాంఛితమైన మార్పుల వలన కూడా ఇది సంక్రమించవచ్చు. తొలిదశలో గుర్తించటంతో బాటు పూర్తిగా నయమయ్యే వరకు చికిత్స తీసుకుంటే సొరియాసిస్ పూర్తిగా నయమవుతుంది.

సొరియాసిస్ అంటే?

మనిషి చర్మంలో ఎపిడర్మిస్‌, డర్మిస్‌, హైపోడర్మిస్‌ అనే పొరలుంటాయి. ప్రతి 28 రోజులకోసారి ఈ పొరల్లోని చర్మకణాలు చనిపోవటం, తిరిగి కొత్తవి పుట్టటం జరుగుతుంది.మృత కణాలు చర్మపు పై పొర అంటే ఎపిడర్మిస్‌ ద్వారా బయటికి వచ్చి రాలిపోతుంటాయి. అయితే సొరియాసిస్‌ బాధితుల్లో ఈ ప్రక్రియ కేవలం ఐదారు రోజుల్లోనే పూర్తవుతుంది. దీనివల్ల మృతకణాల సంఖ్య పెరిగిపోయి ఆ కణాలన్నీ చర్మం పై పొరమీద అట్టకట్టి పొలుసులుగా రాలిపోతుంటాయి. ముఖ్యంగా మోచేతులు, మోకాళ్లు, వీపు, ఛాతి, తల బాగాల్లోంచి ఎక్కువగా ఈ కణాలు బయటపడుతుంటాయి.

కారణాలు

 వంశపారంపర్యత, తీవ్రమైన మానసిక ఒత్తిడి, పొడి చర్మం, ధూమపానం,హఠాత్తుగా వచ్చే వాతావరణ మార్పులు,వాడే మందుల ప్రభావం వల్ల సొరియాసిస్ వచ్చే ప్రమాదం ఉంటుంది. స్థూలకాయం, మధుమేహం, అధిక రక్తపోటు వంటి సమస్యలు కూడా సొరియాసిస్ వచ్చేందుకు దోహదపడే ఇతర కారణాలుగా ఉన్నాయి.లక్షణాలు

తొలిదశలో చర్మం మీద చిన్నఎర్రటి మచ్చలు ఏర్పడి క్రమంగా అక్కడి చర్మం చర్మం బూడిద రంగులోకి మారిపోయి చేప పొలుసుల్లా రాలిపోతుంది. దురదతో కూడిన ఈ మచ్చలు ఆవగింజ సైజు నుంచి కొన్ని సెంటీ మీటర్ల దాకా విస్తరిస్తాయి. చర్మం మీదున్న పొలుసులను బలంగా లాగినప్పుడు చర్మం మీద చిన్న చుక్కల్లా రక్తం వస్తుంది. తలలో అయితే పెద్ద పెద్ద పొలుసుల రూపంలో చుండ్రులా రాలిపోతుంటాయి. గోళ్లు గుంతలు పడటం, గోరు పసుపు రంగులోకి మారి చర్మం నుంచి వేరుపడటం కనిపిస్తుంది.

సొరియాసిస్‌ వ్యాధి రకాలు

1. సొరియాసిస్‌ వల్గారిస్‌: దీన్నిప్లేక్‌ సొరియాసిస్‌ అని కూడా అంటారు. ఎక్కువమందిలో ఈ రకం సొరియాసిస్‌ కనిపిస్తుంది. ఇది చర్మం మీద ఎక్కడైనా రావచ్చు. బాధితుల్లో చర్మం ఎర్రబడి తర్వాత తెల్లని పొలుసులు, దురద ఉంటాయి. ఇది మోచేతులు, మోకాళ్లు, తల, ఛాతీ, ఉదర భాగం, వీపు పైన ఎక్కువగా కనపడుతుంది. 

2. ఇన్వర్స్‌ సొరియాసిస్‌: దీన్నే ఫ్లెక్సూరల్‌ సొరియాసిస్‌ అంటారు. పెద్ద, పొడి, సున్నితమైన, ఎర్రని పొలుసులతోకూడిన ఈ రకం సొరియాసిస్ ఎక్కువగా చర్మం మడతల్లో.. గజ్జల్లో, పిరుదల భాగంలో, వక్షోజాల కింది భాగంలో, జననేంద్రియ భాగాలలో, చంకలలో, ఎక్కువ వత్తిడి, రాపిడి ఉండే చోట్ల వస్తుంది. ఈ వ్యాధి సోకిన చోట చర్మం ఎర్రగా నిగనిగలాడుతుంది. అధిక బరువు ఉన్నవారిలో ఎక్కువగా కనిపిస్తుంది. ఈ రకమైన సొరియాసిస్‌కి చికిత్స కూడా కష్టంగానే ఉంటుంది.
3. పస్ట్యులార్‌ సొరియాసిస్‌: చర్మం పగుళ్ల వద్ద బ్యాక్టీరియల్‌ ఇన్‌ఫెక్షన్‌ వల్ల వస్తుంది. ఒక్కసారిగా ఒంటిపై నొప్పిగా ఉండే చీము పొక్కులు రావటం,విపరీతమైన జ్వరం దీని లక్షణాలు. దీనికి అత్యవసరంగా చికిత్స చేయటం అవసరం.
4. పామా ప్లాంటార్‌ సొరియాసిస్‌: మిగిలిన శరీరభాగాలు బాగానే వున్నా అరికాళ్ళు, అరచేతులు పగుళ్లు బారి వాటి మధ్యలోంచి స్రావాలు కారతాయి.
5. గట్టేట్ సొరియాసిస్: దీనివల్లబాధితుల ఒంటిపై నీటి పొక్కులు, ఎర్రని చుక్కల్లా మొదలై ఒళ్ళంతా విస్తరించి శాశ్వతమైన మచ్చలు పడతాయి. చర్మం ముందు ఎర్ర గా మారి తర్వాత బూడిద రంగులోకి మారి పొలుసులు రాలుతాయి. ఛాతీ, మోచేతులు, తల, వీపు భాగాలలో వస్తుంది. ఇది యువకుల్లో ఎక్కువగా కనిపిస్తుంది. కుటుంబంలో ఎవరికైనా ఈ వ్యాధి వున్నప్పుడు ఇది వచ్చే ప్రమాదం ఎక్కువ.
6. పోస్టులార్ సొరియాసిస్ : వేడి అధికంగా ఉండే ప్రదేశాలలో, తీవ్రమైన ఎండలో తిరగడం వల్ల, గర్భవతిగా ఉన్నపుడు, చెమట ఎక్కువగా పట్టేవారిలో, తీవ్రమైన మానసిక ఒత్తిడిని అనుభవించే వారిలో, రసాయన పరిశ్రమల్లో పనిచేసే వారికి ఈ రకం సొరియాసిస్వచ్చే ముప్పు ఎక్కువ. దీనివల్ల చేతులు, కాళ్ళ చర్మంపైన మచ్చలు ఏర్పడి వాటినుంచి చిక్కని స్రావాలు లో చీములాంటి ద్రవం విడుదల అవుతుంది
7. నెయిల్ సొరియాసిస్: చేతి, కాలి గోళ్లపైన తెల్లని మచ్చలు, గుంటల రూపంలో ఏర్పడతాయి. కొన్నిసార్లు మచ్చలు పసుపు రంగులో వుంటాయి. గోళ్ల కింద చర్మం నుంచి గోరు వేరు పడిపోయి అక్కడ మృతచర్మం ఏర్పడుతుంది. సొరియాసిస్‌తో బాధపడే రోగులలో సగం మందికి గోళ్లలో మార్పులు కనిపిస్తాయి. 

చికిత్స

ఏ రకం సొరియాసిస్ అనే నిర్ధారణ అయినా తర్వాత అందుకు తగిన చికిత్స చేస్తారు. కొందరికి కేవలం పైపూత మందులతో, మాయిశ్చరైజర్ల వినియోగంతోసమస్య దారికి రావచ్చు. న్యారోబ్యాండ్ యూవీబీ, గోకెర్మన్ థెరపీల వంటివీ అందుబాటులో ఉన్నాయి. సమస్యతీవ్రంగా ఉంటే మాత్రలు, ఇంజెక్షన్లు కూడా ఇవ్వాల్సి ఉంటుంది. మనుషులు లేదా జంతువుల నుంచి తీసిన ప్రోటీన్లయిన 'బయోలాజికల్స్' కూడా ఇప్పుడు అందుబాటులో ఉన్నాయి. ఇవి నేరుగా రోగనిరోధకవ్యవస్థ మీదనే పనిచేస్తాయి. సమస్య చర్మం వరకూ రాకుండా అడ్డుకుంటాయి.